Cathair gan Spraoi

galway | environment | news report Wednesday September 03, 2003 12:47 by Alex Hijmans - Foinse 091-595520

Fo-dhlithe nua ag teacht salach ar íomhá spraoiúil na Gaillimhe

Tá déagóirí sásta 'dul go príosún' chun a gcearta clárscátála (skateboarding) ag Póirse Caoch na Gaillimhe a chosaint. Tá na cearta seo, chomh maith le cearta eile, i mbaol ó dhá fho-dhlí nua a bhéas á bplé ag Comhairle Chathrach na Gaillimhe an tseachtain seo chugainn.

Tá déagóirí ‘sásta dul go príosún’, má thagann sé chuige sin, chomh fada agus a bheidh siad in ann coinneáil orthu ag clárscátáil (skateboarding) ag an bPóirse Caoch i nGaillimh. Níl déagóirí na Póirse Caoiche leo féin: tá dhá fho-dhlí nua atá á mbeartú ag Comhairle Cathrach na Gaillimhe cáinte go géar ag eagraíochtaí pobail agus Páirtí an Lucht Oibre agus an Comhaontas Glas freisin.
Dar leo siúd atá i gcoinne na bhfodhlithe go bhféadfadh na fodhlithe nua íomhá saor, liobrálach na Gaillimhe a scrios.
I measc rudaí eile, cuirfidh an fo-dhlí um Pháirceanna agus Spásanna Oscailte atá á bheartú ag Comhairle Cathrach na Gaillimhe cosc ar dhaoine clárscátáil (skateboarding), scátáil (rollerblading) nó dul ag snámh, ach amháin in áiteanna a bhfuil cead tugtha go sonrach dul i mbun na gcaitheamh aimsire seo. Mar a tharlaíonn sé, níl liosta d’áiteanna ina mbeidh cead dul i mbun na gcaitheamh aimsire seo curtha ar fáil fós.
Ní amháin sin, ach faoin fho-dhlí nua, caithfear cead Comhairle Cathrach na Gaillimhe a lorg má tá os cionn 100 duine le cruinniú in aon áit amháin, rud, dar leo siúd atá ag cur i gcoinne na bhfo-dhlithe nua, a sháraíonn cearta daonna, agus Bunreacht na hÉireann féin.
Faoin fho-dhlí eile atá dréachtaithe ag an Chomhairle Chathrach ní bheidh cead aon bhileoga bolscaireachta a scaipeadh sa chathair, rud a chuirfidh srian le saoirse chainte agus chumarsáide eagraíochtaí pobail agus eagraíochtaí polaitiúla, dar leo siúd atá i gcoinne na bhfo-dhlithe.
“I dtús báire, ceapaim go bhfuil sé fíorchontúirteach coir a dhéanamh as caitheamh aimsire,” a dúirt an Comhairleoir Cathrach Catherine Connolly (Lucht Oibre). “Ach tá an riail a deir go gcaithfidh tú cead na Comhairle Cathrach a lorg má tá cruinniú d’os cionn 100 duine a bheith ann ag teacht salach ar chearta daonna agus ar Bhunreacht na hÉireann féin,” a dúirt an Comhairleoir Connolly.
“Bím ag scátáil ar an Prom mé féin,” a deir Connolly, “agus dá ndéanfainn sin tar éis don fhodhlí nua dul i bhfeidhm bheinn ag briseadh an dlí!”
Tá John Deely, úinéir an tsiopa clárscátála ‘Gravity’ ar an tSráid Thrasna, agus urlabhraí ar son an lucht clárscátála ag an bPóirse Caoch, fíormhíshásta le pleananna na Comhairle Cathrach freisin.
“Ceapaim go bhfuil na fodhlithe nua náireach amach is amach. Ceapaim go bhfuil sé dochreidte go bhfuil an Chomhairle ag iarraidh cosc a chur ar chaitheamh aimsire sláintiúil a chuireann le haclaíocht pháistí,” a deir John Deely le Foinse.
“Tá déagóirí de naoi nó deich mbliana d’aois ag rá liomsa go bhfuil siad sásta dul go príosún mar gheall ar bheith ag clárscátáil ag an bPóirse Caoch,” a deir Deely.
Ach dar leis an Chomhairle Chathrach nach bhfuil sé i gceist acu srian a chur le saoirse chainte aon duine ná cosc a chur ar spórt agus caitheamh aimsire, ach go bhfuil sé i gceist acu rud éigin a dhéanamh faoin fhadhb bhrúscair a tharraing drochchlú ar chathair na Gaillimhe níos luaithe sa bhliain.
“Dréachtanna atá sna fo-dhlithe nua seo go fóill; níl siad ina ndlí fós,” a deir Breandán Ó hEaghra, urlabhraí ar son Comhairle Chathrach na Gaillimhe. “Sula mbeidh siad ina ndlí, beidh ar na Comhairleoirí, atá tofa ag an bpobal, iad a scrúdú agus cinneadh a dhéanamh mar gheall orthu. Ach is cinnte nach bhfuil sé i gceist ag Comhairle Chathrach na Gaillimhe saoirse chainte aon duine a theorannú ná cosc a chur ar chaitheamh aimsire aclaíoch. Is éard atá i gceist ag na daoine a dhréachtaigh na fo-dhlithe seo ná rud éigin a dhéanamh faoin bhfadhb bhrúscair i nGaillimh,” a mhíníonn Ó hEaghra.
I dtaobh na gclárscátálaithe ag an bPóirse Caoch, deir Breandán Ó hEaghra ó Chomhairle Chathrach na Gaillimhe go bhfuil áiseanna clárscátála curtha ar fáil cheana féin ag an Chomhairle Chathrach i bPáirc Mhílaoise na bPáistí, trasna ón Ardeaglais, agus go bhfuil sé i gceist ag an Chomhairle tuilleadh de na háiseanna seo a chur ar fáil amach anseo.
“I súile na Comhairle tá an áit atá roghnaithe ag na clárscátálaithe ag an bPóirse Caoch an-chontúirteach. Níl ann ach go bhfuil muid ag cuartú athrú ionaid dóibh,” a mhíníonn Ó hEaghra.